Izenburua: Pentaedroa
Idazlea: Txema García-Viana
Argitaletxea: Elkar
Urtea: 2019
Irun Hiriko Kutxa Literatura Saria
Frankistek herri txiki bat hartu eta egundoko errepresioa ezarri dute. Jende askoren bila dabiltza, tartean, Pentaedroa osatzen duten bost kideen bila. Hauek, halabeharrez, sakabanatu egin dira. Norberak bere istorioa bizi du, eta, hala ere, boston istorioak behin eta berriz txirikordatzen dira, patuak haien bizitzak hari ikusezin baina sendoen bidez lotuko balitu bezala. Argumentu orokor horretan bildu ditu Txema Garcia-Vianak hamaika istorio, gerrari berari buruzko hausnarketa batekin batera. Pentaedroa gerra-nobela da, beraz, drama eta abentura dira nagusi, baina thrillerretik ere badu. Lan sendo eta arnasa luzekoa da, prosa landu eta nortasun handikoa, Garcia-Vianak idazle gisa lortu duen heldutasunaren lekuko.
Oso liburu interesgarria, Txema Garcia-Vianaren azken liburua, Irun saria jaso zuen liburua, hain zuen.
Gerra Zibilean girotuta dago eta bost hari ditu: Pentaedro izeneko antzerki-taldeko bost antzezleena. Gerra piztean bakoitzak bere istorio propioa biziko du eta istorio horiek kontatzen dizkigu Txemak, txandakatuz.
Nahiz eta interesa inoiz ez galdu, amorragarria iruditu zait batzutan beste pertsonaien istorioa irakurri behar izatea, noiz eta beste pertsonaia bat une interesgarriena bizitzen ari zenean. Une horietan, lau kapitulu saltatzeko tentazioa izan dut, baina azkenean idazleak nahi izan duen moduan irakurri dut liburu osoa.
Amaiera ustekabekoa izan da eta horrek ginda jarri dio oso gozoa bazen tartari.
Azkar irakurtzen da liburua eta oso zapore gozoa utzi dit. Hizkera, gainera, ederra eta erderismorik gabekoa izan da.
Ondorioz, oso gomendagarria da liburu hau.